.jpg)
KLABU ya Simba ya jijini Dar es Salaam, imevunja rasmi mkataba na kocha wake, Zdravko Logarusic, ikiwa ni siku moja tu baada ya timu hiyo kutambulisha silaa zake mpya za usajili kwa msimu mpya wa ligi Kuu Tanzania Bara, ambapo ilichezea kichapo cha mabao 3-0 kutoka kwa ZESCO ya Zambia katika mchezo wa kirafiki uliopigwa kwenye uwanja wa Taifa jijini Dar es Salaam, juzi jumamosi.
Kwa hatua hiyo ya kumtimua Kocha, Rais wa Simba, Evans Aveva ametoa barua ya tamko na kutoa sababu za maamuzi hayo, ambapo amesema kuwa, Logarusic amevunjiwa Mkataba kwa kukiuka masharti ya mwajiri wake na sasa Nahodha wa zamani wa klabu hiyo, Suleiman Abdallah Matola ‘Osama’ aliyekuwa Msaidizi wa Loga, ndiye anakuwa kaimu kocha Mkuu hadi atakapopatikana mwalimu mwingine.
Loga ambaye aliongezewa Mkataba wa mwaka mmoja mwezi uliopita, imeelezwa kuwa amefukuzwa kwa sababu za kinidhamu na kikubwa ni kuwatolea maneno yasiyofaa wachezaji.
Inaelezwa Loga alifikia hatua ya kuwadharau na kuwatolea maneno yasiyofaa hadi viongozi wa klabu hiyo.
Loga anaondoka Simba SC baada ya kuiongoza katika mechi 21 tangu Desemba mwaka jana, kati ya hizo akishinda nane, sare tano na kufungwa nane.
Loga aliyerithi mikoba ya Mfaransa, Patrick Liewig aliikuta Simba SC bado ipo kwenye mbio za ubingwa msimu uliopita, lakini mwishowe ikamaliza nafasi ya nne nyuma ya Mbeya City, Yanga SC na Azam FC mabingwa.